Олий ва ўрта махсус таълим вазирлиги ахборот хизмати хабар беришича, вазирлик ҳамда Германия Халқаро ҳамкорлик жамияти ҳамкорлигида қишлоқ хўжалиги соҳасида фаолият олиб борувчи мутахассислар ва фермерлар, қолаверса талаба-ўқувчилар малакасини оширишда ёрдам берувчи олмон олимлари ўқув қўлланмаларининг ўзбек тилидаги электрон шакллари тайёрланди.
2020 йилнинг 11 декабрь куни «Ўзбекистоннинг танланган ҳудудларида иқтисодиёт ривожланишини қўллаб қувватлаш» лойиҳаси доирасида вазирликка 1400 та «Фермер: Бошланғич босқич» китобининг рус тилидаги ҳамда «Фермер: Бошланғич босқич» ва «Фермер: Ихтисослик босқичи» ўқув қўлланмаларининг ўзбек тилидаги электрон шакллари 580 та компакт дискларда тақдим этилди.
Ушбу ўқув қўлланмалар қишлоқ хўжалигига ихтисослашган профессионал таълим муассасаларида таълим олаётган ўқувчиларга мўлжалланган бўлиб, уларда ўсимликшунослик, қишлоқ хўжалик техникаларини жорий этиш ва чорвачилик соҳалари амалий нуқтаи назардан батафсил ёритилган.
Германиялик Хорст Лохнер ва Йоханнес Бреккер муаллифлигида яратилган ўқув қўлланмалари профессор Херберт Штроебель ташаббуси билан профессорлар Отабой Жуманиёзов ва Рўзимбой Эшчонов раҳбарлигида ўзбек тилига таржима қилинди.
