Германиядаги поездлар ҳалокати оқибатида ҳалок бўлганлар сони 10 нафарга етди, деб хабар беради “Euronews”.
Шунингдек, яна бир киши бедарак йўқолган. Уни бешикаст топиш имкони тобора камайиб бормоқда.
Сўнгги маълумотларга кўра, Бавария ерида “Меридиан” компаниясига тегишли икки поезд тўқнашувида 80 дан ортиқ йўловчилар жабрланган. 18 киши оғир тна жароҳати олган. иккала поезднинг машинистлари ҳам ҳалок бўлган.
9 февраль, сешанба куни икки йўловчи поезди ҳозирча номаълум сабабларга кўра, битта йўлга тушиб қолган ва бир-бирига қараб ҳаракатлана бошлаган. Икки поезд тўқнашуви маҳаллий вақт билан 6:48 да Мюнхендан 60 километр жанубий шарқдаги Бад-Айблинг аҳоли яшаш пункти яқинида содир бўлган.
Поездлар ўрмон ва дарё оралиғидаги ҳудудда тўқнашиб, бир-бирига шундай зарар етказдики, оқибатда поездлардаги бир неча вагонлар изидан чиқиб, отилиб кетган. Германия темир йўлларида бундай йирик темир йўл ҳалокати сўнгги бор 1998 йилда кузатилган эди.
Йўловчилардан бири қуйидагича ҳикоя қилади:
“ Биз қўққисдан поезд секинлашаётганини, сўнг қаттиқ зарбни ҳис қилдик. мен олдинга отилиб кетган эдим. Кўзимни очиб қарасам, атроф қоп-қоронғу. Инграш ва йиғи овози эшитиларди. Ёнгинамда беҳуш боланинг ётганини кўрдим. Уни кўтариб олиб, олдимдаги ўриндиқлардан бирига ўтқаздим. Сўнг атрофимдагилардан жароҳатланганлар йўқми, деб сўрадим. Биз ўтирган вагондаги йўловчилар орасида жиддий жароҳатланганлар йўқ эди. Шундан кейин бошқа бир нечта йўловчилар билан бирга авариявий чиқиш эшигини очиб, ташқарига чиқдик.
Ҳозирда поездларнинг “қора қути”лари топилган. Ҳозирда уларни ўрганиш ишлари олиб борилмоқда. Германия Федерациясининг транспорт вазирлиги ҳалокатнинг асл сабаби маълум бўлмагунча турли миш-мишлар тарқатмасликни сўради. Теракт ҳақидаги гап-сўзларни ҳукумат вакиллари рад этди.
Бир-бирига қарама-қарши ҳаракатланаётган поездлар оралиқлаги бекатларда бошқа-бошқа йўлларга тушиб олиши керак эди. Нима учун бундай бўлмагани сабаблари ҳозирда ўрганилмоқда.
Шуни ҳам таъкидлаш керакки, поездлар катта тезликда келиб бир-бирига урилган. Соатига 100 километр тезликда бир-бирига яқинлашаётган поездларда кўриниш даражаси паст бўлгани машинистларга тезликни камайтириб, тўқнашувга тайёргарлик кўриш имконини бермаган.
