Ангрен-Поп электрлаштирилган темир йўл линияси қурилиши якунига етмоқда

ЖАМИЯТ 15.02.2016, 16:52
Ангрен-Поп электрлаштирилган темир йўл линияси қурилиши якунига етмоқда

“Ўзбекистон темир йўллари” АЖ томонидан амалга оширилган Ангрен-Поп электрлаштирилган темир йўл линияси қурилиши ишлари ўз ниҳоясига етмоқда.

Юртбошимизнинг 2013 йил 18 июндаги “Ангрен-Поп электрлаштирилган темир йўл линияси қурилишини ташкил этиш чора-тадбирлари тўғрисида”ги қарори қабул қилинган эди. 

Ўтган қисқа давр мобайнида ушбу қарор асосида темирйўлчилар узунлиги 123,1 километр бўлган ноёб қурилишда ҳамда лойиҳа доирасида қурилаётган узунлиги 19,1 километрни ташкил этувчи туннелда улкан бунёдкорлик ишларини амалга оширдилар, дея хабар беради Компания Ахборот хизмати. 

Бунинг натижаси ўлароқ, мураккаблиги бўйича дунё миқёсида биринчи 8 таликдан жой олган ушбу лойиҳанинг туннелдан ташқари 104 километрида барча қурилиш, ишлари тўлиқ тугатилди ва 2015 йил август ойининг охирида ишчи поездлар ҳаракати йўлга қўйилди. Ушбу улкан темир йўл қурилишида 43 миллион кубометр тупроқ ишлари ҳамда 16,3 миллион кубометр бурғулаш портлатиш ишлари бажарилди. Лойиҳа асосида 285 та сунъий иншоот ва cув ўтказиш қувурлари, 4 та темир йўл станцияси, 4 та разъезд ва 2 та вокзал қуриб битказилди.

Янги темир йўл қурилиши лойиҳаси бўйича умумий узунлиги 2 минг 100 метрдан зиёд бўлган кўприклар бунёд этилди. Бундан ташқари, умумий узунлиги 151 метрлик 3 та кўприк реконструкция қилинди.

Мазкур ҳудудда қурилган кўприклар нафақат қуруқлик ёки текис жойда, балки, мураккаб шароитларда, баланд тоғ қоялари орасида бунёд этилгани юртимиз кўприксозларининг юксак тажрибага эгалигини яна бир бор исботлади. 

Энг муҳими, ушбу кўприкларнинг устунлари орасига қўйилган, ҳар бирининг оғирлиги қарийб 100 тоннани ташкил этувчи темирбетон балкалари ҳам айнан “Ўзбекистон темир йўллари” АЖга қарашли “Кўприкқурилиш” трести унитар корхонасида тайёрланганлиги эътиборга моликдир.

Шарҳлар

Об-ҳаво: Тошкент
Валюта курси
1