2 сентябрь куни ўлими бутун дунёни ларзага солган суриялик болакай Айлан Курдининг вафот этганидан сўнг ҳам ҳозиргача Туркиядан Грецияга ўтиш учун ҳаракат қилган 300 дан ортиқ муҳожир болалар денгиз қаърига ғарқ бўлган, деб хабар берди “Еuronews” нашри.
Денгиз қирғоғида жасади ётган болакайнинг сурати Евроиттифоқнинг муҳожирларга нисбатан салбий фикрини ўзгартириб, муҳожирлик инқирозига тааллуқли ҳал қилувчи қарор чиқаришга шошилтирган эди.
Брюссель муҳожирларни тақсимлаш бўйича лойиҳа таклифини бериб, қочоқларни жойлаштиришни йўлга қўйгунга қадар чегараларда назоратни кучайтирди. Аммо улар бу вазифанинг уддасидан чиқа олмадилар.
Ўтган йили Еврокомиссия Ўртаер денгизида қидирув-қутқарув операцияларини ўтказиш учун 70 миллион евро маблағ ажратган эди. Бироқ кўрилган чора-тадбирларга қарамай, ҳамон бегуноҳ норасидалар Ўртаер ва Эгей денгизлари қаърига ғарқ бўлмоқдалар.
2015 йил октябрь ойининг ўзида Европага етиб боришга ҳаракат қилган 84 нафар бола денгизда ҳалок бўлган.
