Баъзида кутилмаган муаммолар ҳаётимизга ёпирилиб кириб, бизни саросимага солиб қўяди. Бу синовлар баъзилар учун вақтинчалик бўлса, баъзиларнинг эса ҳаётини тубдан ўзгартириб юборади.Бундай лаҳзаларда сизга далда бўладиган кўмак зарур бўлади. Шунинг учун сизга ҳаётнинг кутилмаган тасодиф ва синовларини мағрур кутиб олиб, ҳар қандай шароитда ҳам тушкунликка тушмаган инсонлар ҳаёти ҳақидаги ҳикояларни тақдим этмоқдамиз. 

Ник Вуйчич

Қўлсиз, оёқсиз – жисман ожиз бўлса-да, руҳан кучли бўлган бу инсон депрессияга тушмай, ҳар қандай шароитда ҳам яшаш мумкинлигини исботлаган инсон намунасидир. Демак бахтсизликдан ҳам бахт ахтариб, қувониб яшаш мумкин экан. Бу ҳаммаси одамнинг ўзига боғлиқ. Ник гольф ўйнайди, серфинг, нотиқлик санъати билан шуғулланади, дунё бўйлаб саёҳат қилади. Яқинда унинг иккинчи фарзанди дунёга келди. Кўчада учраб қолган болалар “Сизга нима қилди?” деб савол беришса, Ник “Ҳаммаси сигаретадан!” деб жавоб беради.

Билл Портер

Агар инсон олдига мақсад қўйса, унга эришиш истаги жуда ҳам кучли бўлса, ҳеч қандай касаллик орзуни рўёбга чиқаришга тўсқинлик қилолмайди. Билл Портер туғилганданоқ церебрал фалажликдан азият чекди. У савдо соҳасида ишлашни орзу қилган. Касаллик унинг ниятларини амалга оширишига халақит қилолмади. Билл Портер Американинг энг пешқадам сотувчиларидан бирига айланди. Унинг кучли иродасига бағишлаб, “Эшикдан эшиккача” (Door to Door, 2002) фильми суратга олинди. Бу фильмни ўзлари ҳаётда шуғулланишни истаган соҳада фаолият юрита олмаган, қўлимдан ҳеч нима келмайди деган инсонлар албатта томоша қилишлари лозим. 

Евгений Смирнов

Раққос учун рақсга тушиш имкониятидан маҳрум бўлиш энг мудҳиш воқеадир. Агар профессионал раққос ЙТҲ оқибатида оёғидан ажралиб қолсачи? У яна рақсга тушиши лозим! Евгений Смирнов, брейк-данс бўйича Россия чемпиони оёғидан айрилгач, рақсга тушишни қайтадан ўрганди. Унинг рақс шоуларидан биридаги қойилмақом рақси инсон нафақат ирода кучи билан, балки чин дилидан истаса, бир оёқда ҳам рақсга тушиши мумкинлигини тасдиқлади

Олеся Владикина

Олеся 20 ёшга тўлганда тақдирнинг аянчли зарбасига учради. У Таиландда нафақат дугонасини балки чап қўлини ҳам йўқотди. Бу воқеа унинг ҳаётини батамом ўзгартириб юборди, аммо у бундан тушкунликка тушмади. У икки марта Паралимпия ўйинларида муваффақиятли қатнашиб, биринчи ўринни эгаллади ва жаҳон рекордини ўрнатди. Қиз протез қўлни ноқулай ҳисоблаб, уни тақишни рад этди, у бир қўллаб барча ишларни аъло даражада эплайди. 

Сильвестр Сталлоне

Идеал актёр бўлиш учун инсоннинг ташқи қиёфаси гўзал бўлиш керак деб ўйласангиз, адашасиз. Агар шундай деб ўйласангиз, Сильвестор Сталлоненинг ҳаётини кўз олдингизга келтиринг. У туғилаётганда жароҳат олиб, юзининг чап қисми мушаклари қотиб қолган, оғзи ҳам бироз чапга қийшайган. Бунинг натижасида тили ҳам қисман фалажланиб қолган (шунинг учун Сталлоне бироз тутилиб гапиради). Энди ўйлаб кўринг, бу жисмоний камчиликлар унинг жаҳон миқёсидаги машҳур актёр бўлиб танилишида халақит қилдими?

Андреа Бочелли

Кўзи ожизлик инсонни атрофни томоша қилиш имкониятидан маҳрум қилса-да, ҳис қилиш имкониятидан жудо қилолмайди. Балки италиялик Андреа Бочеллига айнан шу нарса ёрдам берар?  Кўзи ожиз, классик ва оммабоп қўшиқлар ижрочиси италиялик Андреа Бочелли қўшиқлари орқали тингловчиларни илҳомлантирувчи ва ларзага солувчи аҳволга солади. Уч фарзанднинг отаси бўлмиш Андреа Бочелли яқинда иккинчи марта уйланиб, ҳаётдан мамнун. Унинг айтишича “ташқи” назардан маҳрум бўлса ҳам, “ички” назари билан ҳамма нарсани ҳис қилади. 

Мэдлин Стюарт

Мэдлин Стюарт Даун синдроми билан туғилган бўлса ҳам, подиумга модель сифатида кўтарилишдан чўчимади ва буни қойилмақом уддалади. Албатта бундай муваффақиятга эришиш осон кечмади, у 20 кг га озди, узоқ вақт моделлик агентига киришга ҳаракат қилган, аммо агентлик уни тезда “хислатли” моделлар сафига қабул қилишга шошилмади. Аммо Мэдлин ўз мақсадига эришиб, аёллар учун спорт кийимлари ишлаб чиқувчи Manifesta бренди билан йирик шартномани имзолади. Яқинда у Нью-Йоркда ўтказилган мода ҳафталигида ҳам қатнашди. Агар истак кучли бўлса, орзулар албатта амалга ошади.

Виктория Дюваль

Спортчи ҳар қандай шароитда ҳам спортчилигича қолишини 20 ёшли америкалик теннисчи Виктория Дюваль Хожикин лимфомаси касаллигини енгиб, жисмоний машқларни давом эттирди ва тенниснинг Катта шлем турнирида ғалабани қўлга киритди. Аммо бизнинг назаримизда Виктория нафақат  турнирни, балки давоси йўқ дардни ҳам енгди ва эвазига ҳаёт деган ғалабани қўлга киритган. 

Шантель Браун-Янг

Бу моделнинг гўзаллик тарихи ҳақиқатан ҳам ғалати: Шантелнинг терисини болалигиданоқ тиббиёт тили билан айтганда “Витилиго” деб аталмиш доғ қоплаган эди. Чиройли қад-қоматга, гўзал чеҳрага эга бўлган қиз бу камчиликни фазилатга айлантиришга ҳаракат қилди ва бунга эришиб, гўзал модель деган номга сазовор бўлди. “Дунёда оқ ва қора танли одамлар мавжуд, мен эса уларнинг ҳар иккаласига ҳам мансубман”, деб у ҳазил-мутойиба билан ўз ташқи қиёфасига изоҳ беради.

Ксения Безуглова

Икки фарзанднинг онаси, Vertical ногиронлар аравачасида ўтирадиганлар орасида ўтказилган гўзаллик танлови ғолибаси, жамоат арбоби, ҳаётдан завқ олиб яшовчи каби фазилатларни санайверсак, уларнинг ҳисобига етолмаймиз. Бу фазилатларнинг барчаси Ксения Безугловага тегишлидир. Фавқулодда ирода кучига эга Ксения ногиронлар аравачасига михланиш, ҳаётнинг тугашини эмас, балки унда истаганингча яшашинг, бахтга эришишинг мумкинлигини исботлаб берди!

P.S.

Ҳаёт инсонни ҳар томонлама синаб кўришни ёқтиради. Аммо у қанчалик инжиқ, адолатсиз бўлмасин, барибир ундан воз кечиш қийн. Ҳатто биз уни ....гача ва .... дан кейин деб икки вариантга бўлишга мажбур бўлган вазиятимизда ҳам унинг бизни бахтли қилиши мумкин бўлган варианти мавжуд. Бу ҳар қандай шароитда ҳам чидамлилигингни кўрсатиб, бахтли бўлиш имкониятидир! Юқорида номлари келтирилган инсонлар бунга ёрқин мисол бўла олади. Улар сизнинг келажак ҳаётингизда илҳом бағишлашади.

Манба: Adme.ru