Россиялик теннисчи Мария Шарапованинг қонида тақиқланган препарат аниқланганидан сўнг, у билан ҳамкорлик қиладиган номдор компаниялар бирин-кетин ҳамкорлик шартномаларини бекор қилмоқда. Бу ҳақда “Вести” нашри хабар бермоқда.
Мария сўнгги 11 йил ичида энг кўп ҳақ тўланадиган спортчи ҳисобланади. Британия ОАВларининг хабар беришича, 28 ёшли теннисчи спорт тарихида рекорд сумма йўқотган инсон бўлиши мумкин. Яъни у йўқотиши мумкин бўлган сумма худди шундай вазиятда йирик маблағдан айрилган спортчилар—гольфчи Тайгер Вудс ёки велоспортчи Лэнс Армстронгникидан ҳам кўпроқ бўлиши мумкин.
Nike, Porsche ва TAG Heuer компаниялари Мария Шарапова билан тузилган шартномаларни бекор қилганини маълум қилди. Мазкур савдо белгилари, шунингдек, теннисчи билан боғлиқ можаролар ўз ниҳоясига етмагунга қадар унинг иштирокидаги барча тадбирларни бекор қилди. Avon, American Express ва Head каби компаниялар ҳам Шарапова билан шартнома имзолаган. Мазкур брендлар ҳам теннисчи билан тузилган шартномаларни бекор қилиши мумкин.
Теннисчи Мария Шарапова профессионал теннисдан тўрт йилга четлатилиши мумкин. Агар шундай бўлса, Шарапова Australian Open турнирининг чорак финалидаги иштироки учун олган 209 минг фунт миқдоридаги маблағни ҳам қайтаришига тўғри келади.
Маълумот учун, россиялик теннисчи 7 март куни матбуот анжумани уюштириб, қонидан олинган намунада тақиқланган препарат аниқланганини тан олди.
