Асли келиб чиқиши ямайкалик бўлган модель Алексия Палмер АҚШ президентлигига номзод, миллиардер Дональд Трампга тегишли Trump Model Management моделлик агентлигини судга берди. Бу ҳақда “Lenta.ru”хабар бермоқда.
Палмер агентликни фирибгарликда ва муҳожирлар билан тузилган шартнома шартларини бузганликда айблади. Алексия компаниядан 225 минг доллар миқдорда товон пули талаб қилмоқда.
Моделнинг фикрига кўра, агентлик федераль ҳукуматни ҳужжатларни расмийлаштиришда алдаган. Шартнома бўйича у гўёки йилига 75 минг доллар олиши керак, аслида эса уч йиллик меҳнати учун бор-йўғи тўрт минг долларга яқин пул олган.
Трампнинг адвокатлари эса “бу унчалик жиддий муаммо эмаслигини” ва моделнинг шунчаки ишлари юришмаганини айтиб ўтган. Уларнинг айтишича, Палмер агентликда ўн кунча ишлаган ва олган пули ҳам шунга яраша.
Маълумот учун, АҚШ президентлигига номзод Дональд Трамп муҳожирларга ёмон муносабат билдириши билан тилга тушган.
