Жаҳоннинг энг яхши теннисчилари рўйхатида бешинчи ўринда турувчи спортчи, испаниялик Рафаэль Надаль Франциянинг собиқ спорт вазири Розлин Башлони судга бермоқчи. Бу ҳақда “Lenta.ru” хабар бермоқда.
Маълумотларга кўра, собиқ вазир теннисчини допинг қабул қилганликда айблаган.
“Менинг қонимда тақиқланган препарат йўқ. Бу юз фоиз. Мен ўзимга нисбатан бир неча марта айбловлар эшитдим. Аммо бу охиргиси бўлади. Мен Башлони туҳмат қилгани учун судга бермоқчиман. Бундан кейин ҳам менга нисбатан айнан шундай айбловни илгари сурган исталган киши билан судлашаман”, — деди Надаль.
8 март куни Франция телевидениесида чиқиш қилган Башло 29 ёшли испаниялик теннисчи етти ой мобайнида қонида тақиқланган препарат аниқлангани учун мусобақаларда иштирок этмаганини айтиб ўтган эди. У яна кенг жамоатчиликка бу ҳол Надаль жароҳатлангани учун даволанаётгани сабаб ўйинларда қатнашмаётгандек кўрсатилганини ҳам билдирган.
7 март куни Лос-Анжелес шаҳрида ўтказилган матбуот анжуманида теннисчи Мария Шарапова ўз қонида тақиқланган мельдоний препарати аниқланганини эълон қилди. Мазкур препарат 2016 йилнинг 1 январидан “қора рўйхат”га киритилган.
Бутунжаҳон допингга қарши агентлиги мельдонийни гормонлар гуруҳига киритди. Уни истеъмол қилгани учун Шарапова икки йилдан тўрт йилгача ўйинлардан четлатилиши мумкин.
