Бошқирдистоннинг Стерлитамак шаҳрида ёнғин оқибатида 12 киши ҳалок бўлди. Бу ҳақда “Lenta.ru” хабар бермоқда.
15 мартга ўтар кечаси Тукаева кўчасида жойлашган бир қаватли хусусий уй ёниб кетди.
Ёнғин бартараф этилганидан сўнг бино ичидан 12 кишининг жасади топилган. Полиция ёнғин сабаблари ва ҳалок бўлганларнинг шахсини аниқлашга киришган. Ҳодиса жойида криминал лаборатория ходимлари иш олиб бормоқда. Шаҳарга ички ишлар вазири вазифасини бажарувчи адлия генерал майори Виктор Михайлов ҳам ташриф буюрган.
Фавқулодда вазиятлар вазирлигининг берган маълумотларига кўра, ёнғин ҳақидаги хабар маҳаллий вақт билан 05:12 да қабул қилинган. Соат 07:20 ларда ўт ўчирилган. Ўт ўчириш учун 19 та техник бирлик ва 52 киши жалб этилган.
Ҳалок бўлган 10 нафар эркак ва икки нафар аёл Россияга МДҲ мамлакатларидан келиб ишлаётгани маълум бўлди. Улардан саккиз нафари Қирғизистон фуқаролари, икки нафари асли қирғизистонлик бўлган Россия фуқаролари, икки нафари эса Ўзбекистон Республикаси фуқаролари бўлган.
