Японияда ўлим жазосига ҳукм қилинган икки нафар жиноятчи осиб ўлдирилди. Бу ҳақда мамлакат адлия вазири Мицухидэ Ивакига асосланиб, “Lenta.ru” хабар бермоқда.
Осиб ўлдирилган жиноятчилардан бири 75 ёшли Ясутоси Камата. У беш нафар кишини, хусусан 9 ёшли қизчани злдирганликда айбланган эди. Қотил қизчани мактабдан қайтаётган пайтда ўғирлаб кетган ва уйига олиб бориб, бўғиб ўлдирган. Унинг бошқа қурбонлари 19 ёшдан 45 ёшгача бўлган аёллар. У 1999 йилда ўлим жазосига ҳукм қилинган эди. Иккинчи қатл этилган жиноятчи эса 56 ёшли Дзюнко Ёсида. У ўзининг жиноий шериклари билан келишиб, бир неча марта суғурта бадалларини олиш учун эрларини ўлдирган. Ёсида Япония тарихида 1950 йилдан бери қатл этилган бешинчи аёл бўлди.
Ҳозирги кунда Японияда яна 124 нафар жиноятчи ўлим жазосини кутмоқда. Мамлакатда ўлим жазоси фақат осиб ўлдириш орқали амалга оширилади. Ўлим жазосига ҳукм қилинган маҳбуслар қатл этиладиган санани жазо бажарилишидан бир неча соат олдин билишади.
