Одатда, халқаро фестивалларда кўпгина янгиликлар сир сақланади. Тошкент халқаро кинофестивалининг ташкилотчилари ҳам таниқли меҳмонлар ҳақидаги маълумотларни сир сақлашмоқда. Аммо ички манбалардан маълум бўлишича, «Кино 5 кунда» танлови ғолибларини франциялик машҳур кинорежиссёр, сценарист, продюсер ва ёзувчи Люк Бессоннинг шахсан ўзи тақдирлайди. Бу ҳақда Кинематография агентлиги Ахборот хизмати маълум қилди.
«Кино 5 кунда» ёш киноижодкорлар танлови бўлиб, иштирокчилар турли мукофотлар — дипломлар, ҳайкалчалар ва пул мукофотлари билан тақдирланади. Ҳар бир ёш бу мукофотни қўлга киритишни, айниқса, уни Люк Бессоннинг қўлидан қабул қилиб олишни орзу қилади.
Эслатиб ўтамиз, «Кино 5 кунда» танловини мақсади, миллий кинони қўллаб-қувватлаш, рағбатлантириш ва ривожлантиришга қаратилган. Танлов иштирокчилари дастурга мувофиқ беш кун ичида ўзбек урф-одатлари, маданияти ва тарихига оид фильмларни суратга олишлари керак бўлади.
