19 мартдан 14 майгача Маданият ва санъатни ривожлантириш жамғармаси томонидан Халқаро театр фестивалини - 2022 ташкил этилади. Бу ҳақда Туризм ва маданий мерос вазирлиги хабар бермоқда.
Унда Москванинг «Современник» театри, Замонавий песа мактабининг Москва театри, Миллатлар театри, А.П. Чехов номидаги Москва бадиий театри, Борис Эйфман балет Санкт-Петербург давлат академик театри, Алишер Навоий номидаги Давлат академик катта театри, Хамза номидаги Ўзбек миллий драма театри, Марк Вайлнинг “Илҳом” театри, шунингдек, Ўзбекистон ёшлар театри иштирок этишади.
Жаҳон юлдузлари ташрифлари доирасида концертлар, спектакллар, намойишлар, маҳорат дарслари ўтказилади, ўзаро тажриба алмашилади, бу эса маданиятлараро ҳамкорликни ривожлантиришга хизмат қилади.
15 мартдан 14 майга қадар Алишер Навоий номидаги Давлат академик катта театрида, Марк Вайлнинг “Илҳом” театрида ҳамда Ҳамза номидаги Давлат академик драма театрида қатор спектакллар ҳамда балет постановкалари бўлиб ўтади.
Фестивал дастуридан “ Лазги – Қалб ва Муҳаббат рақси” балет постановкаси ҳам ўрин олган. Лазги уч минг йиллик тарихга эга. Мазкур қадимий Хоразм рақси сир ва афсоналарга йўғрилган, азалий халқ ҳикматини ифодалайди. Унинг номи “ Қалб ва муҳаббат” деган маънони англатади. 2019 йилда “Лазги” Хоразм рақси UNESСОнинг номоддий маданий мероси рўйхатига киритилган.
15 martdan 14 mayga qadar Alisher Navoiy nomidagi Davlat akademik katta teatrida, Mark Vaylning “Ilhom” teatrida hamda Hamza nomidagi Davlat akademik drama teatrida qator spektakllar hamda balet postanovkalari bo‘lib o‘tadi.
