Ёш истеъдодлар учун “Ниҳол” мукофоти танловининг Қорақалпоғистон Республикаси босқичи бўлиб ўтди. Бу ҳақда ЎзА хабар бермоқда.
Мамлакатимиз Биринчи Президенти ташаббуси билан истеъдодли, санъатга ихлосманд ёшларни излаб топиш ва уларни қўллаб-қувватлаш мақсадида 2000 йилда ташкил этилган ушбу танловда эстрада, мусиқа, мумтоз қўшиқ, рақс ва опера санъати ижрочилиги бўйича 17 ёшдан 30 ёшгача бўлган йигит-қизлар ўз қобилиятини намоён этиб келмоқда.
Жорий йилда танловнинг Қорақалпоғистон Республикаси босқичида унинг қуйи босқичларида сараланган 47 нафар йигит-қиз қатнашди. Ҳар бир иштирокчининг профессионал тайёргарлиги, бадиий ижрочилик маҳорати, репертуар савияси – матн ва мусиқа уйғунлигига баҳо берилди. Уларнинг ижтимоий фаоллиги, маънавий-ахлоқий фазилатларига ҳам алоҳида эътибор қаратилди.
Турли йўналишлар бўйича 10 нафар ғолиб танловнинг мамлакат босқичига йўлланма олди.
