Деярли бир ҳафта давомида Тожикистон пойтахти Душанбе шаҳри дзюдо бўйича ёшлар ўртасидаги жаҳон чемпионатига мезбонлик қилди.
Дунёнинг 67 давлатидан 600 нафарга яқин дзюдочи қатнашган дунё биринчилигида Ўзбекистон ёшлар терма жамоаси ҳам муваффақиятли иштирок этди. Яккалик мусобақасида -100 кг вазн тоифасида юртимиз шарафини ҳимоя қилган Муҳаммадсодиқ Содиқов барча рақибларини мағлубиятга учратиб, жаҳон чемпионига айланди. У ҳал қилувчи финал баҳсида япониялик дзюдочини вазари баҳоси эвазига таслим этди.
Муродил Муродиллаев, Мардон Равшанов ва Алишер Саманов терма жамоамизга бронза медалларини тақдим этишди. Якунда Ўзбекистон ёшлар терма жамоаси 1 та олтин ва 3 та бронза медали билан умумжамоа ҳисобида 4-ўринни эгаллади. Аралаш жамоавий баҳсларда эса Ўзбекистон терма жамоаси Озарбайжонни 4:2 ҳисобида мағлуб этиб, бронза медалига сазовор бўлди.
Бироз аввал Ўзбекистон спорт делегацияси Душанбе шаридан юртимизга қайтиб келди. Ислом Каримов номидаги Тошкент халқаро аеропортида музаффар спортчиларимизни Спорт вазирлиги, Миллий олимпия қўмитаси ҳамда мамлакат дзюдо федерацияси мутасаддилари кутиб олишди ва уларни қўлга киритилган муваффақият билан қутлашди.
