Англия терма жамоаси ва “Бавария” клуби ҳужумчиси Ҳарри Кейн 2025/2026 йилги мавсум якунларига кўра “Олтин тўп” мукофоти билан тақдирланди. Бу ҳақда France Football журнали маълум қилди.
Маълум қилинишича, тақдирлаш маросими Лондонда бўлиб ўтган.
Кейн ўтган мавсумда “Бавария” сафида 51 та учрашувда майдонга тушиб, 61 та гол урган ва 7 та голли узатмани амалга оширган. У жамоаси билан Германия чемпионлиги ва мамлакат кубогини қўлга киритган. Шунингдек, англиялик ҳужумчи Бундеслиганинг энг яхши тўпурари бўлган ва Европа миллий чемпионатларида энг кўп гол урган футболчига бериладиган “Олтин бутса” совринига сазовор бўлган.
Терма жамоа сафида ҳам муваффақиятли иштирок этган Кейн Жаҳон чемпионатида 7 та учрашувда майдонга тушиб, 6 та гол урган ва 1 та голли узатмани амалга оширган.
Маълумот учун, “Олтин тўп” мукофоти 1956 йилдан бери топшириб келинади. Англиялик футболчилар орасида мазкур совринни аввал Стэнли Мэттьюз (1956), Бобби Чарльтон (1966), Кевин Киган (1978 ва 1979) ҳамда Майкл Оуэн (2001) қўлга киритган.
1995 йилгача мукофотга фақат Европа клубларида тўп сурадиган европалик футболчилар даъвогарлик қилиши мумкин эди. Кейинчалик бу чеклов бекор қилиниб, Европа клубларида ўйнайдиган бошқа қитъалар вакилларига ҳам имконият берилди. 2007 йилдан эса дунёнинг исталган клубида тўп сурадиган футболчилар мукофот учун курашиш ҳуқуқига эга бўлди.
