Хитойда "Реал Мадрид" клуби ҳужумчиси Килиан Мбаппенинг футболкалари, плакатлари ва реклама материаллари йўқ қилинмоқда. Бунга франциялик футболчининг Хитойнинг собиқ раҳбари Мао Цзэдун ҳақидаги гаплари сабаб бўлган. Бу ҳақда "EFE Noticias" хабар берди.
Маълум қилинишича, 27 ёшли Мбаппе яқинда ўзининг энг севимли меми Мао Цзэдун портрети устига унинг юзи жойлаштирилган фотоколлаж эканини айтган. Шунингдек, у Мао Цзэдунни Хитой диктатори деб атаган. Бу гаплар Хитойдаги айрим футбол мухлисларининг норозилигига сабаб бўлган.
Мухлислар футболчининг футболкаларини ёқиш билан бирга, унинг тасвири туширилган плакатлар ва реклама материалларини ҳам йўқ қилмоқда.
Мбаппенинг баёнотларидан сўнг Хитойнинг энергетик ичимликлар ишлаб чиқарувчи "Dongpeng" ҳамда сут маҳсулотлари ишлаб чиқарувчи "Mengniu" компаниялари футболчи билан ҳамкорликни тўхтатаётганини маълум қилган. Шунингдек, Хитой марказий телевидениеси Мбаппе иштирок этадиган "Реал Мадрид" ўйинлари трансляцияларини вақтинча тўхтатгани хабар қилинди.
Юзага келган вазиятдан кейин футболчининг ўзи, "Реал Мадрид" клуби ва Испания Ла Лигаси раҳбарияти Хитой халқидан узр сўраган.
