Бугун, 3 декабрь куни Олий Мажлис Қонунчилик палатасининг навбатдаги йиғилишида муҳим молиявий ҳужжати – Давлат бюджетининг қабул қилиниши бўйича ҳужжат муҳокамаси бўлиб ўтди.
Мажлисда қонун лойиҳаси юзасидан Бош вазир ўринбосари — Иқтисодиёт ва молия вазири Ж. Қўчқоров маъруза қилган.
Дастлаб келгуси йил “Атроф-муҳитни асраш ва «яшил» иқтисодиёт йили” деб эълон қилинганлиги муносабати билан ушбу йўналишларга сарфланадиган маблағларнинг манзиллилига ва натижадорлигига эътибор қаратилган. Шунингдек, соғлиқни сақлаш, таълим, маданият, спорт ва иқтисодиёт соҳалари бўйича муҳокамаларда депутатлар томонидан кўтарилган масалаларга ойдинлик киритилган. Хусусан, айрим асосли таклифлар буджет ва солиқ тизимларини такомиллаштириш жараёнида инобатга олинадиган бўлган.
Депутатлар билдирган таклиф ва тавсияларни ҳисобга олган ҳолда қонун лойиҳасига бир қанча консептуал аҳамиятга эга бўлган ўзгартиришлар киритилмоқда.
ЎзЛиДеП фракцияси таклифи билан Болаларни қўллаб-қувватлаш жамоат фондига қўшимча 35,5 млрд. сўм маблағ ажратилиши белгиланмоқда.
“Миллий тикланиш” фракцияси таклифи билан кинематография соҳасини янги босқичга кўтариш учун қўшимча 40 млрд. сўм маблағ ажратилиши кўзда тутилмоқда.
"Адолат" СДП фракцияси Омбудсман институтининг моддий-техника базасини яхшилаш бўйича берган таклифларини асосли деб топиб, қўшимча 3,1 млрд.сўм маблағ ажратиладиган бўлди.
ЎзХДП фракциясининг тавсияси билан Камбағалликни қисқартириш ва бандлик вазирлиги ҳузуридаги Миллий малака тизимини ривожлантириш институтини ташкил этиш харажатлари учун қўшимча 10,6 млрд. сўм маблағ ажратилиши белгиланди.
Экологик партияси фракцияси таклифи билан “Яшил макон” умуммиллий лойиҳаси учун қўшимча 100 млрд. сўм маблағ ажратилмоқда.
Бундан ташқари, фракция аъзоларининг таклифига кўра, Қорақалпоғистон Республикасида ўрмончилик соҳаси илмий-тажриба станциясини ташкил этиш харажатлар учун қўшимча 9,5 млрд.сўм маблағлар ажратиладиган бўлди.
Муҳокамаларга бой бўлган мажлисда ижтимоий соҳа ва иқтисодиёт тармоқлари бўйича депутатлар томонидан кўтарилган масалаларга Ҳукумат томонидан тузилган ишчи гуруҳ ҳамда тегишли вазирлик ва идоралар масъул ходимлари томонидан ойдинлик киритилди.
Шунингдек, мажлисда депутатлар субсидиялар ва унинг натижадорлиги, буджет очиқлигини таъминлаш, буджет маблағлари устидан молиявий назорат тизимларини такомиллаштириш ҳамда тиббий суғуртани жорий қилиш бўйича аниқ таклиф ва тавсиялар билдиришган.
Таклиф этилаётган қонун лойиҳасида буджет тақчиллиги чекланган миқдорининг ошиб кетишига йўл қўймаслик, Давлат буджети ва давлат мақсадли жамғармалари ҳисобидан қўшимча харажатларни амалга оширишда қонун талабларига қатъий риоя қилиш, давлат ташқи қарзининг ва давлатнинг шартли мажбуриятлари бўйича лойиҳада белгиланган чегарадан ошиб кетмаслик бўйича ҳукуматнинг ўз зиммасига олаётган мажбуриятлари депутатлар томонидан қўллаб-қувватланди.
Мажлисда қонун лойиҳаси депутатлар томонидан қабул қилинди ва Сенатга юборилди.
