Колумбиянинг Каука департаменти ҳудудида юз берган кучли портлаш оқибатида 14 киши ҳалок бўлди, яна камида 38 киши жароҳат олди. Ҳодиса Панамерика шоссесида одамлар гавжум пайтда содир бўлган.
Ҳудуд губернатори Октавио Гусман X ижтимоий тармоғида маълум қилишича, жабрланганлар орасида 5 нафар вояга етмаганлар ҳам бор. Портлаш йўл инфратузилмасига, айниқса Панамерика шоссесига жиддий зарар етказган. Губернатор ҳалок бўлганлар яқинларига ҳамдардлик билдириб, жароҳатланганларга зарур ёрдам кўрсатилаётганини таъкидлади.
Колумбия президенти Густаво Петро ушбу ҳужумни кескин қоралаб, уни содир этганларни «террорчилар, фашистлар ва наркосавдогарлар» деб атади. У халқаро ҳамжамиятни бу гуруҳларга қарши курашни кучайтиришга чақириб, уларнинг молиявий манбаларини аниқлаш ва йўқ қилиш зарурлигини билдирди.
Расмийлар ҳодиса юзасидан тергов ишларини олиб бормоқда.
