Бугун, 27 март тонгида Туркиянинг Бурса шаҳридаги Улудағ минтақасида жойлашган ва бир муддат ёпилган “Карвонсарой” меҳмонхонасида ёнғин содир бўлди. Ёнғин оқибатида 3 киши ҳалок бўлди, меҳмонхонанинг уч ходими тутундан нафас олиш оқибатида ҳушсиз ҳолда шифохонага олиб кетилди. Бу ҳақда “Karar” хабар берди.
Маълум қилнишича, ёнғин соат 06:00 атрофида меҳмонхонанинг буфет бўлимида бошланган. Олов тезда бутун тузилмага тарқалгач, воқеа жойига кўплаб ўт ўчириш бригадалари жўнатилган. Экипажлар икки соатга яқин ёнғин билан курашган ва алангани назорат остига олишга муваффақ бўлган.
Олинган маълумотларга кўра, воқеа вақтида меҳмонхонада бўлган 12 нафар ходимдан 9 нафари бинони тарк этишга муваффақ бўлган. Бироқ зич тутун туфайли ичкарида қолиб кетган уч нафар ходим ўт ўчирувчилар томонидан қутқариб олинган.
Жумҳурият Халқ партиясидан депутат Орхан Сарибал ёнғин билан боғлиқ баёнотида Бурса шаҳар ҳокимиятининг текширувларидан сўнг, бу меҳмонхонанинг туризм фаолият сертификати илгари бекор қилинганини маълум қилган.
“Афсуски, ўт ўчирувчиларимиз тезда жавоб берган ёнғинда фуқароларимизни йўқотдик. Ёнғинда ҳалок бўлганларга раҳм-шафқат, оиласига сабр, жароҳатланганларга эса тезроқ шифо тилайман. Бу воқеа Улудағда ҳокимиятнинг чалкашлиги ва назоратсизликнинг қанчалик хавфли эканини яна бир бор очиб берди”, деган у ўз баёнотида.
Хабарга кўра, ёнғин сабабларини аниқлаш бўйича суриштирув ишлари бошлаб юборилган ва воқеа жойи ўраб олинган.
“Бурса Улудағдаги ёпиқ “Карвонсарой” меҳмонхонамизнинг орқасидаги очиқ айвонда кечаси номаълум сабабларга кўра ёнғин келиб чиқди ва меҳмонхонамизга тарқалди. Ўт ўчириш бўлими томонидан тезда назоратга олинди”, дейилади меҳмонхона хабарида.
