Президент Шавкат Мирзиёевнинг “Ёқилғи-энергия ресурсларидан ноқонуний фойдаланиш ва беҳуда сарфланишининг олдини олиш ҳамда энергия самарадорлигини ошириш бўйича чора-тадбирларни такомиллаштириш тўғрисида”ги қарори қабул қилинди.
Қарорга мувофиқ Республиканинг ҳар бир тумани (шаҳри) кесимида энергия балансини ишлаб чиқиш, уларнинг кўрсаткичларини бажариш, энергияни тежаш дастурлари ижросини таъминлаш, энергия самарадорлигини ошириш бўйича туман (шаҳар) идоралараро ишчи гуруҳлари тузилади.
Қарор билан тасдиқланган туман (шаҳар) идоралараро ишчи гуруҳининг намунавий таркибига кўра, туман (шаҳар) прокурори туман (шаҳар) идоралараро ишчи гуруҳи раҳбари қилиб белгиланган.
Мазкур қарорга асосан:
- - ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича республика штабига юклатадиган қўшимча вазифалар;
- - ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича ҳудудий штабларнинг устувор вазифалари;
- - туман (шаҳар) идоралараро ишчи гуруҳларининг устувор вазифалари;
- - ҳудудий штаблар ҳамда туман (шаҳар) идоралараро ишчи гуруҳлари фаолиятининг асосий йўналишлари тасдиқланган.
Шунингдек, ҳар бир туман (шаҳар)да энергия ресурсларини тежаш ва тармоқлардаги йўқотишларни камайтириш бўйича режа кўрсаткичлари бажарилиши устидан назоратни амалга ошириш мақсадида Бош прокуратуранинг 208 нафар ходимлари мазкур қарорнинг иловасига туман (шаҳар)ларга бириктирилган.
Бош прокуратура ва Энергетика вазирлиги Рақамли технологиялар вазирлиги, Ўзенергоинспексия, Божхона қўмитаси, Солиқ қўмитаси билан биргаликда икки ой муддатда ушбу соҳада назорат ва мониторингни амалга ошириш имконини берувчи мавжуд электрон платформаларни мазкур қарор билан белгиланаётган янги талаблардан келиб чиқиб такомиллаштириш юклатилган.
Вазирликлар, идоралар ва бошқа давлат ташкилотларининг раҳбарлари энергия тежамкорлик кўрсаткичлари ҳақидаги маълумотларни доимий равишда ушбу платформаларда акс эттириб бориш ва маълумотларнинг ҳаққонийлигига масъул ва шахсий жавобгар этиб белгиланган.
