Хитой Ташқи ишлар вазирлиги Украина томонидан илгари сурилган, гўёки Хитой Россияга махсус кимёвий маҳсулотлар, порох ва мудофаа саноати учун бутловчи қисмлар етказиб бераётгани тўғрисидаги айбловларни инкор этди.
Бу баёнот Украина Ташқи разведка хизмати раҳбари Олег Иващенко томонидан берилган фикрларга жавоб сифатида янгради. Иващенко Хитой 20 та Россия ҳарбий-саноат корхонасига бутловчи қисмлар етказиб бераётганини маълум қилган эди.
Шунингдек, у 2025 йил бошига келиб, Россия дронларида қўлланилаётган муҳим электрон бутловчи қисмларнинг 80 фоизи Хитойда ишлаб чиқарилганини қайд этган.
Хитой ТИВ расмий вакили Мао Нин Хитойнинг Украинадаги уруш борасидаги позицияси "изчил ва аниқ" эканини таъкидлади.
"Биз доим оташкесимга эришиш ва тинчлик музокараларини илгари суриш тарафдори бўлиб келганмиз. Хитой ҳеч қачон можарога алоқадор бирор томонга ўлдирувчи қуроллар етказиб бермаган ва икки томонлама фойдаланилиши мумкин бўлган маҳсулотларга қатъий назорат ўрнатган," — деди Мао Нин матбуот анжуманида.
"Украина бундан яхши хабардор. Хитой асоссиз айбловлар ва сиёсий манипуляцияларга қатъиян қарши," — дея қўшимча қилди у.
Россия Украинага қарши тўлиқ миқёсдаги урушни бошлаганидан бери Хитой Москва билан алоқаларни мустаҳкамлади ва Россия мудофаа саноатини қўллаб-қувватловчи икки томонлама фойдаланилиши мумкин бўлган маҳсулотларнинг етакчи етказиб берувчисига айланди.
Хитой ўзини урушда эҳтимолий воситачи сифатида кўрсатаётган бўлса-да, у бир вақтнинг ўзида АҚШ ва унинг иттифоқчиларини Украинага қурол етказиб бериш орқали урушни "чуқурлаштиришда" айблаб келмоқда. НАТО эса Хитойни Россия тажовузига "ҳал қилувчи ёрдамчи" деб атаган.
Президент Владимир Зеленский 17 апрель куни Хитой Россия армиясига қурол етказиб бераётганини маълум қилган эди — бу Киевнинг Пекин Россиянинг уруш ҳаракатларини тўғридан-тўғри қурол билан қўллаб-қувватлаётганини илк бор расман тасдиқлаши бўлди.
Жорий ой бошида Ғалаба куни муносабати билан Москвага ташриф буюрган Хитой раиси Си Цзиньпин билан Россия ўртасида “Вашингтоннинг Россия ва Хитойга нисбатан икки томонлама босимини кескин рад этиш учун ҳамкорликни мустаҳкамлаш” бўйича келишувга эришилди.
Киев 22 апрель куни Хитой фуқаролари ва компаниялари Россиянинг Украинага қарши уюштирган тўлиқ миқёсдаги урушда иштирок этгани ҳақида далиллар тақдим этган, Хитой эса бу айбловларни "асоссиз ва сиёсий манипуляция" деб рад этган.
Абдуллоҳ Саййид
