Ёқилғи қуйиш, сақлаш ва ташиш объектларида ёнғин хавфсизлигини таъминлаш бўйича Фавқулодда вазиятлар вазирлиги огоҳлантирув билан чиқди. Мурожаат фонида бир неча портлаш ва ёнғин ҳолатлари қайд этилган.
Фавқулодда вазиятлар вазирлиги мамлакатдаги ёқилғи билан боғлиқ объектлар раҳбарларига мурожаат йўллади. Унда техника ва ёнғин хавфсизлиги қоидаларига қатъий риоя қилиш, ёнғинга қарши воситаларнинг доимий соз ҳолатда бўлишини таъминлаш, масъул шахслар тайинланиши ҳамда ходимларнинг фавқулодда ҳолатлардаги ҳаракатларга тайёргарлиги назорат қилиниши зарурлиги таъкидланган.
Алоҳида урғу қуйидаги жиҳатларга қаратилган:
— суюлтирилган газ, бензин ва дизель ёқилғисини тўкиш жараёнида хавфсизликни таъминлаш;
— аҳолининг автомобилларда ўрнатилган газ балонларини мунтазам техник кўрикдан ўтказиб бориши.
Бу огоҳлантириш бир қатор сўнгги ёнғин ва портлашлар фонида берилди:
— Шўрчи туманида газ қуйиш шохобчасида портлаш;
— Жомбой туманида автомобиллар иштирокидаги ёнғин;
— Кўкдала туманида газ қуйиш шохобчасидаги портлашда 4 киши ҳалок бўлди, оила аъзоларига 100 млн сўмдан компенсация тўланди;
— Хоразмда, 8 август куни мобил АЁҚШда катта ёнғин содир бўлди.
Мазкур ҳодисалар юзасидан Жиноят кодексининг 205 ва 259-моддалари асосида тергов ишлари олиб борилмоқда.
