АҚШнинг Massachusets технология институти (MIT) олимлари сунъий интеллект ёрдамида дори воситаларига чидамли гонорея ва хавфли МРСА (метитсиллинга чидамли олтин рангли стафилококк) бактерияларини йўқ қилишга қодир 2 та янги антибиотик ишлаб чиқди. Бу ҳақда BBC хабар берди.
Билдирилишича, улар лабораторияда ҳайвонлар устида муваффақиятли синовдан ўтказилган. Шунга қарамай, уларни беморларга қўллашдан олдин бир неча йиллик такомиллаштириш ва клиник синовлар талаб этилади.
SI дастлаб маълум дориларнинг кимёвий тузилиши ва уларнинг бактерияларга таъсири ҳақидаги маълумотлар билан бойитилган. Кейин эса икки йўналишда иш олиб борилган — бири мавжуд кимёвий фрагментлар билан ишлаш, иккинчиси эса SI га тўлиқ эркинлик бериш.
Натижада инсон саломатлиги учун хавфли бўлмаган ва мавжуд антибиотикларга ўхшамайдиган 2 та истиқболли дори ишлаб чиқилган. Улар лаборатория шароитида сичқонларда синовдан ўтказилиб, ижобий натижага эришилган.
Олимлар препаратлар ҳали клиник синовларга тайёр эмаслигини, уларни такомиллаштириш учун камида яна 1–2 йил керак бўлишини таъкидламоқда.
