Учрашувда Ўзбекистон ва Жанубий Корея ўртасидаги алоҳида стратегик шериклик муносабатларини мустаҳкамлаш, савдо-иқтисодий ва инвестициявий ҳамкорликни кенгайтириш масалалари кўриб чиқилди. Юқори мартабали меҳмон Ўзбекистон раҳбарига Корея Республикаси Президенти Ли Чжэ Мённинг самимий саломи ва эзгу тилакларини етказди.
Қайд этилишича, жорий йил бошидан ўзаро товар айирбошлаш ҳажми 12 фоизга ошган. Мамлакатимизда қарийб мингта қўшма корхона фаолият юритмоқда, кореялик инвесторлар киритган сармоялар ҳажми 8 млрд доллардан ошган. Корея компаниялари учун махсус саноат зонасини ташкил этиш масалалари ишлаб чиқилмоқда.
Корея Эксимбанки иштирокидаги лойиҳалар портфели 2 млрд доллардан ошгани таъкидланди. Кўп тармоқли клиника, кимё маркази ва фармацевтика парки қурилиши давом этмоқда. Шунингдек, Тошкент – Хива йўналишида Hyundai Rotem поезди қатнови бошланди.
Томонлар давлат молиясини бошқаришни рақамлаштириш, янги инвестиция лойиҳаларини шакллантириш ва кузда Сеулда ўтказилиши режалаштирилган “Марказий Осиё – Корея” саммитига тайёргарлик масалаларига алоҳида эътибор қаратди.
