Навоий вилояти ИИБнинг маълум қилишича, воқеа 2024 йил 22 август куни тунги соат 2:00 атрофида “Зиёкор” маҳалласида содир бўлган. Кармана туманида яшовчи, 1994 йилда туғилган С.А. танишлари билан ресторанга бориб, овқатлангач, тўлов қилиш учун автомобилга чиққан. Шу вақтда ресторан ходими — 2004 йилда туғилган М.У. ундан қолган пулни тўлашни сўраган.
Спиртли ичимлик таъсирида бўлган С.А. оғзаки жанжал асносида М.У.нинг юзига уриб, тан жароҳати етказган. Ҳуқуқни муҳофаза қилувчи органлар гумонланувчининг Олимпиада чемпиони эмаслигини, бироқ у билан ресторанга келган шахс — 1995 йилда туғилган икки карра паралимпиада чемпиони Э.С. бўлганини аниқлади.
Маълум қилинишича, Э.С. ҳодиса пайтида автомобиль салонида бўлган, кейинчалик можаро юзасига аралашиб, вазиятни бартараф этишга ҳаракат қилган ва жабрланувчига тез ёрдам чақиртирган.
Ҳодиса юзасидан Жиноят кодексининг 277-моддаси 1-қисми (безорилик) билан жиноят иши қўзғатилган, С.А. процессуал тартибда ушланган. Ҳозирда тергов ишлари давом этмоқда.
