“Ўзбекнефтгаз” 2025 йил 2 сентябрдан бошлаб Аи-80 бензинини биржа савдолари орқали сотишни тўхтатганини эълон қилди.
Маълум қилинишича, энди Аи-92 русумидаги автобензиннинг биржа савдоларига чиқариш ҳажмлари оширилди. Компанияга кўра, шу вақтга қадар 1 000 тонна Аи-92 бензини савдоларга қўйилган бўлса, бугунги кунда бу рақам 1 720 тоннани ташкил этмоқда. Ички бозор талабидан келиб чиқиб, бу ҳажмларни ошириш имконияти мавжуд.
Август ойида тадбиркор истеъмолчилар томонидан харид қилинган Аи-80 русумидаги автобензин ҳажмлари мажбурият ва мавжуд қолдиқлар доирасида сентябрь ойида ҳам ўз эгаларига етказиб берилади.
“Ўзбекнефтгаз” босқичма-босқич юқори октанли (Аи-92) автобензин ишлаб чиқаришга ўтиши ва сентябрдан бошлаб биржа савдоларига фақат юқори октанли автобензин жойлаштирилиши режалаштирилганини июль ойида маълум қилганди.
“Ўзбекистон–2030” стратегиясини “Атроф- асраш ва яшил иқтисодиёт” йилида амалга оширишга оид давлат дастури тўғрисидаги президент фармонида 2025 йил якунига қадар Аи-80 бензинидан фойдаланиш ва сотишни чеклаш учун барча куч ва ресурслар сафарбар этилиши белгиланган.
