Хитойнинг Пекин шаҳрида 3 сентябрь куни ўтказилган ҳарбий парад Иккинчи жаҳон урушида Япония капитуляциясининг 80 йиллигига бағишланди.
Парадда 10 мингдан ортиқ ҳарбий хизматчи, юзлаб замонавий ҳарбий техникалар, жумладан, ядро ракеталари, дронлар, танклар ва самолётлар намойиш қилинди.
Тантанали маросимда ХХР Раиси Си Цзиньпин билан бир қаторда Россия президенти Владимир Путин ва Шимолий Корея раҳбари Ким Чен Ин иштирок этди. Бу уч етакчининг илк бор омма олдида биргаликда кўриниш берган пайти бўлди. Пекинга шунингдек, 20 дан ортиқ давлат раҳбарлари ташриф буюрди, бироқ кўплаб Ғарб дипломатик вакиллари тадбирда иштирок этмади.
Параддан олдин, АҚШ президенти Дональд Трамп Truth Social’даги постида ушбу учликни АҚШга қарши фитна уюштиришда айблади:
“Владимир Путин ва Ким Чен Ин'га энг илиқ тилакларимни етказинг, сизлар АҚШга қарши фитна режалаштираётган чоғда”, — деб ёзди у.
Трамп, шунингдек, АҚШнинг тарихий жиҳатдан Хитойга кўрсатган ёрдамларини эслатиб ўтди ва бугунги геосиёсий воқеьликни “садоқатга нисбатан хиёнат” сифатида баҳолади.
