АҚШ собиқ президенти Жо Байден пешонасидаги саратон ҳужайраларини олиб ташлаш учун жарроҳлик амалиётини бошдан кечирди. Бу ҳақда The Times нашри хабар берди.
Байденнинг матбуот котиби маълумотига кўра, операцияда “Моос” усули қўлланилган. Бу методда тери саратони аниқланган тўқималар қатламма-қатлам олиб ташланади — то у ерда саратон излари қолмагунча.
Эътиборлиси, Байденнинг рафиқаси Жилл Байден ҳам 2023-йилда ўнг кўзи устида худди шундай операцияни ўтказган эди.
Ижтимоий тармоқларда 82 ёшли Байденнинг Делавердаги черковдан пешонаси боғланган ҳолда чиқиб кетаётган видеоси тарқалди. Бу унинг саратон билан илк тўқнашуви эмас.
Президентлик лавозимига киришишидан аввал у тери саратонига қарши даволанган. 2023-йил феврал ойида кўкрак қисмидан базал ҳужайрали карсинома олиб ташланган эди. Шу йилнинг май ойида эса унда простата бези саратонининг агрессив шакли аниқланган ва касаллик суякларга ҳам тарқалганлиги маълум бўлган.
Байден ўзининг ижтимоий тармоқдаги саҳифасида шундай ёзган эди:
“Саратон — ҳар биримизнинг ҳаётимизга қандайдир тарзда тегади. Кўпчилигингиз сингари, мен ва Жилл ҳам синовлардан ўтиб, айнан шу оғриқли нуқталарда янада кучлироқ бўлишимизни англадик. Бизни меҳрингиз ва қўллаб-қувватлашингиз билан руҳлантирганингиз учун миннатдормиз.”
