Сенатнинг 10-ялпи мажлисида олий таълим муассасаларида талабаларнинг жиноятчиликка аралашиши муҳокама қилинди. Вазир Қўнғиротбой Шариповга парламент сўрови юборилиши белгиланди.
2024 йилда олий таълим муассасалари талабаларининг иштирокида 761 та жиноят содир этилган. 2025 йилнинг дастлабки олти ойида эса 102 та муассасада 307 нафар талаба турли жиноятларга қўл урди.
Асосий жиноятлар қаторида йўл-транспорт ҳодисалари, ўғрилик, тан жароҳати етказиш, безорилик ва фирибгарликлар бор.
Муаммо сабабларидан бири таълим-тарбия жараёнининг самарали ташкил этилмаслиги, талабалар бўш вақтининг мазмунли ўтказилмаслиги ҳамда ота-оналар билан ҳамкорлик етишмаслиги ҳисобланмоқда.
Сенат вакиллари вазирдан ҳуқуқбузарликларнинг олдини олиш ва тарбиявий жараёнларни кучайтириш бўйича аниқ чоралар кўришни талаб қилмоқда.
