АҚШ Президенти Дональд Трамп Россия Президенти Владимир Путин билан яқин кунларда телефон орқали суҳбатлашишини маълум қилди. Бу ҳақда у 7 сентябрь куни журналистлар саволларига жавобан айтиб ўтди.
Трамп Украинадаги урушдан норозилигини билдириб, бу можарони тугатишга ҳаракат қилишини таъкидлади. “Мен у ердаги вазиятдан мамнун эмасман. Урушга оид ҳамма нарсадан норози бўляпман”, — дейди у.
Шунингдек, Трамп бир неча Европа етакчилари АҚШга ташриф буюришини айтди. Учрашувларда, катта эҳтимол билан, Украинага тинчликпарвар кучлар юборилиши масаласи муҳокама қилинади.
Трамп яқин кунларда Путин билан мулоқот бўлиши муҳим қадам бўлишини қайд этди. Шу билан бирга, у Россияга қарши санкцияларни кучайтиришга тайёрлигини билдирди.
АҚШ Молия вазири Скотт Бессант ва Украина бўйича махсус вакил Кит Келлог Россиянинг сўнгги ҳаракатларини урушни кучайтирувчи омиллар сифатида баҳолаган. Украина расмийларига кўра, 7 сентябрга ўтар кечаси Россия томонидан 810 дрон ва 13 ракета учирилган, натижада ҳукумат биноси вайрон бўлган ва тинч аҳоли орасида қурбонлар қайд этилган.
Эслатиб ўтамиз, Россия Президентининг матбуот котиби Дмитрий Песков ҳам Трамп ва Путин ўртасида иккинчи мулоқот раунди бўлиши мумкинлигини тасдиқлаган эди.
