Санкт-Петербург шаҳрида содир бўлган фожиада вафот этган ўзбекистонлик йигитнинг шахси аниқланди. Бош консуллик маълумотига кўра, у 2001 йилда Сурхондарё вилоятида туғилган А.У. бўлиб, жорий йилнинг апрель ойидан буён Россияда ишлаётган эди.
Йигит 16 сентябрь куни Россия Олий суди биноси қурилишида 15 метр баландликдан қулаб тушиб, воқеа жойида вафот этган. Айни пайтда тергов ишлари олиб борилмоқда ва жиноий иш қўзғатиш эҳтимоли кўриб чиқилмоқда.
Ўзбекистоннинг Санкт-Петербургдаги Бош консуллиги ва Миграция агентлиги марҳумнинг яқинлари билан алоқа ўрнатган бўлиб, унинг жасадини ватанга қайтаришда амалий ёрдам кўрсатмоқда.
Маълумот учун, бу сўнгги ҳафталарда Россияда меҳнат фаолияти давомида ҳалок бўлган ўзбекистонлик иккинчи шахсдир.
