Ўзбекистонда фаолият юритаётган олий таълим ташкилотлари сони 2025/2026 ўқув йили бошида 215 тани ташкил қилди. Бу ҳақда Миллий статистика қўмитаси маълумот берди.
Қайд этилишича, мазкур кўрсаткич мустақилликнинг илк йилларига нисбатан 4,1 бараварга ошган. Хусусан, 1991 йилда мамлакатда атиги 52 та олий таълим муассасаси фаолият юритган бўлса, бугунга келиб уларнинг сони 215 тага етган. Ҳисоб-китобларга филиаллар ҳам киритилган.
Статистик маълумотларга кўра, олий таълим ташкилотлари сони 1991 йилдаги 52 тадан 2015 йилга келиб 69 тага етган. Кейинги йилларда эса соҳада жадал ўсиш кузатилиб, 2020 йилда 127 та, 2021 йилда 154 та, 2022 йилда 191 тага чиққан.
2023 йилда мамлакатдаги олий таълим ташкилотлари сони 219 тага, 2024 йилда эса 222 тага етган. Бироқ 2025 йил ҳолатига кўра мазкур кўрсаткич 215 тани ташкил этган.
Маълумот учун, сўнгги йилларда Ўзбекистонда янги олийгоҳлар ташкил этиш ва хорижий университетлар филиалларини очиш бўйича кенг кўламли ислоҳотлар амалга оширилди. Натижада олий таълим қамрови ва муассасалар сони сезиларли даражада ошди.
