Қирғизистоннинг Ўш шаҳридаги истироҳат боғида 18 ёшли қиз аттракциондан йиқилиб, ҳалок бўлди. Бу ҳақда Turmush.kg маълум қилди.
Ҳодиса 21 сентябрь куни Алишер Навоий номидаги паркда юз берган. Уч дугона “Қайиқча” номли аттракционда учаётганида улардан бири йиқилиб тушган. Тез ёрдам ходимлари воқеа жойига етиб келган. Бироқ қиз нафас олмаётганини, у ҳалок бўлганини аниқлаган.
Ўш шаҳар Ички ишлар бошқармаси ҳолат юзасидан тергов ишларини бошлаган. Воқеанинг барча тафсилотлари аниқланмоқда. Ҳуқуқ-тартибот идоралари маълумотларига кўра, марҳума 2007 йилда туғилган Ўш вилояти Қорасув туманида яшовчи қиз бўлган.
2025 йил апрель ойида ўтказилган йиғилишида Алишер Навоий номидаги истироҳат боғларидаги аттракционлар тегишли техник диагностика, лаборатория синовлари ва техник кўрикдан ўтказилмаган ҳолда ишлаб тургани айтилганди. Бундан ташқари, аттракционларга хизмат кўрсатувчи масъул ходимларнинг махсус тайёргарликдан ўтганини тасдиқловчи гувоҳномалар ва санитария дафтарчалари бўлмаган.
