Кеча, 30 сентябрь куни кечқурун Филиппиннинг марказий қисмида 6,9 магнитудали зилзила содир бўлди. АҚШ Геология хизмати маълумотига кўра, ер силкиниши маҳаллий вақт билан соат 22:00 атрофида Паломпон шаҳри яқинида қайд этилган.
Себу провинцияси губернатори Пем Барикуатронинг айтишича, табиий офат оқибатида 27 киши ҳалок бўлган, 143 нафардан ортиқ одам жароҳат олган. Ҳалок бўлганлар орасида қирғоқ хавфсизлиги ходимлари ҳамда Сан-Ремихиода спорт мажмуаси вайроналари остида қолиб кетган ўт ўчирувчи ҳам бор.
Филиппин Қизил Хочи учта провинцияда 60 дан ортиқ кишига тиббий ёрдам кўрсатган. Зилзила черковлар ва мактаб биноларига зарар етказган, айрим ҳудудларда эвакуация ишлари ўтказилмоқда.
Зилзила ортидан Лейте, Билиран ва Себу провинцияларида цунами хавфи эълон қилинган, бироқ 1 октабр куни эрталаб ушбу огоҳлантириш бекор қилинди. Шу пайтда Таал вулқонида ҳам кичик отилиш кузатилиб, 2,5 км баландликка тутун чиққани қайд этилган.
Расмийлар юзага келган зарар ва хавфсизлик чораларини баҳолаш учун мактабларда текширув ўтказилишини, дарслар эса вақтинча тўхтатилганини маълум қилди.
