Мамлакатимизда очиқлик сиёсатининг юритилиши, янгиланиш сари кенг кўламли ислоҳотлар амалга оширилиши натижасида бошқа соҳалар сингари спорт, хусусан, футбол инфратузилмасига халқаро спорт ташкилотларининг эътибори ортмоқда.
Ўтган 2-3 йил оралиғида мамлакатимизга халқаро спорт ташкилотлари раҳбарларининг амалий ташрифлари кўпайди.
Хусусан, Халқаро футбол федерациялари ассоциацияси раҳбари 1-2 йил ичида 3-4 марта Тошкентга келиб кетди ва бу жараён оддий ҳолга айланиб қолди.
Ушбу ташрифлар жараёнидаги мулоқотлар натижасида Ўзбекистон футбол ассоциацияси билан ФИФА ҳамкорлигида кўплаб лойиҳаларни амалга оширишга киришилди.
2024 йили илк бор футзал бўйича ФИФА миқёсидаги жаҳон чемпионатини қабул қилган бўлса, 2027 йили ёшлар ўртасидаги жаҳон биринчилигига мезбонлик қилишга ҳозирланмоқда.
ФИФАнинг футболда технологиялар, инновациялар ва рақамли ривожланиш қўмитаси билан ҳамкорлик алоқалари ўрнатилди.
Айтиш лозим, мазкур қўмита голни аниқлаш технологияси, ярим автоматик офсайд тизими, рақамли мониторинг, сунъий интеллект каби инновацион ечимларни ривожлантириш, синовдан ўтказиш ва футболга жорий этиш устида иш олиб боради.
ФИФА Кенгашининг қарорига кўра, Ўзбекистон футбол ассоциацияси биринчи вице-президенти Равшан Эрматов 2025-2029 йиллар учун ушбу қўмита раисининг ўринбосари этиб тайинланди.
Шунингдек, ЎФА Бош котиби Аваз Максумов Соҳил футболи қўмитаси, ЎФА аёллар футболини ривожлантириш бўлими бошлиғи Юлия Панина Аёллар миллий терма жамоалари ўртасидаги мусобақалар қўмитаси аъзолигига тайинланди.
