Ўзбекистон Ташқи ишлар вазирлиги Россия ҳудудида айрим ноқонуний гуруҳлар Ўзбекистон консуллик муассасалари номидан қалбаки ҳужжатлар тайёрлаб бераётгани юзасидан расмий баёнот берди.
ТИВ маълумотига кўра, сўнгги вақтларда Ўзбекистон фуқаролари томонидан Россиядаги консуллик муассасаларига қалбаки ҳужжатлар тақдим этиш ҳолатлари қайд этилмоқда.
Маълум бўлишича, айрим шахслар ва гуруҳлар “Телеграм” мобиль иловасидаги турли виртуал каналлар орқали Ўзбекистон ва бошқа давлатлар ҳужжатларини “тайёрлаб бериш хизматлари”ни таклиф қилмоқда.
Вазирлик маълумотига кўра, ана шундай жиноий фаолият натижасида фуқаро Э.М.Р. қалбаки “Ватанга қайтиш гувоҳномаси”ни расмийлаштирган. Ўзбекистон Республикасининг Қозон шаҳридаги Бош консулхонаси тезкор ҳаракатлари натижасида ушбу ҳужжатнинг сохталиги аниқланиб, фуқаронинг Россия Федерацияси Жиноят кодексининг 322-моддаси (чегарани ноқонуний кесиб ўтиш) ва 327-моддаси (сохта ҳужжатлар тайёрлаш ёки сотиш) бўйича жиноят содир этишининг олди олинди.
Шунингдек, фуқаро O.Б.Б. қалбаки никоҳ асосида “никоҳ тузилганлиги тўғрисидаги гувоҳнома”ни расмийлаштирган ва унга асосан фарзанди учун “туғилганлик тўғрисидаги гувоҳнома” олгани маълум қилинган.
ТИВ Россия ҳудудида бўлиб турган Ўзбекистон фуқароларини ижтимоий тармоқларда тарқатилаётган “ҳужжат тайёрлаб бериш” ҳақидаги эълонларга ишонмасликка чақирди.
Расмий идора фуқароларга ҳужжатларни расмийлаштиришда фақат Ўзбекистон Республикасининг ваколатли органларига мурожаат этишни қатъий тавсия этмоқда, чунки бу фирибгарлик ва нохуш ҳолатларга тушиб қолишнинг олдини олишга хизмат қилади.
