Қозоғистон президентининг собиқ маслаҳатчиси Ержан Бабакумаров Остона шаҳрида содир бўлган жанжал оқибатида вафот этди, деб хабар берди Orda.kz.
Маълумотларга кўра, 56 ёшли Бабакумаров 36 ёшли эркак билан келишмовчиликка борган. Низо муштлашувга айланиб, натижада у ҳаёт билан мос келмайдиган жароҳатлар олган. Полиция ҳодиса юзасидан жиноий иш қўзғатган ва гумонланувчини ҳибсга олган.
Бабакумаров 1991 йилда Ал-Форобий номидаги Қозоғистон давлат университетини тамомлаган. У турли йилларда Олмаота маъмурияти, президент маъмурияти, Маданият вазирлиги ва бош вазир девонида фаолият юритган.
2019 йилда Қасим-Жомарт Тўқаев президент бўлганида, Бабакумаров унинг маслаҳатчиси сифатида ишлаган. Кейинчалик у Олмаота шаҳар ҳокими ўринбосари лавозимини эгаллаган ва 2022 йилда лавозимидан кетган.
