“Associated Press”нинг хабар беришича, воқеа Мехиконинг тарихий марказида содир бўлган. Президент Клаудия Шейнбаум одамлар билан мулоқотда бўлган пайтда, маст ҳолдаги эркак орқасидан яқинлашиб, унга тегинган.
Тармоқларда тарқалган видеода эркак Президентни ўпиш учун эгилаётгандек кўринган, шу пайтда у қўллари билан Шейнбаумга тегинган.
Президент эса вазиятни сокинлик билан бартараф этиб, эркакни мулойимлик билан четга сурган ва юзидаги табассум билан “Хавотир олманг”, деган.
Ҳукумат вакилларидан бири вазиятга аралашган бўлса-да, Президент маъмурияти ҳодиса юзасидан ҳали изоҳ бермаган.
Маълумот учун, Шейнбаум ўзидан олдинги раҳбар Андрес Мануэль Лопес Обрадор сингари халқ билан яқин мулоқотда бўлишни маъқул кўради. У тез-тез одамлар орасига кириб, суратга тушади ва қўл бериб саломлашади.
Бу сафар эса унинг хавфсизлик хизмати воқеадан кейингина фаоллик кўрсатган.
