Пойтахтда ижтимоий тармоқларда тарқалган “юқумли игна” ҳақидаги видео ҳақиқатга тўғри келмаслиги аниқланди. ИИББ маълумотига кўра, видеони икки шахс “лайк” ва кўришлар йиғиш мақсадида саҳналаштирган.
Тошкент шаҳар Ички ишлар бош бошқармаси хабар беришича, интернетда тарқалган “ОИВ/ОИТС юқтирувчи игна” ҳақидаги видео асоссиз бўлиб, у махсус равишда ижтимоий тармоқларда оммавий қизиқиш уйғотиш мақсадида тайёрланган.
Суриштирув жараёнида видеони яратганлардан бири мазкур ҳолат саҳналаштирилганини тан олган ва қилган ишидан афсусдалигини билдириб, жамоатчиликдан узр сўраган.
ИИБ маълумотига кўра, Ўзбекистонда жамоат жойларида тасодифий игна орқали ОИВ юқиши ҳолатлари қайд этилмаган. Мутахассислар вирус ташқи муҳитда узоқ вақт барқарор бўлмаслигини, қуёш нури таъсирида 2–5 соат ичида юқиш хусусиятини йўқотишини таъкидлади.
Ҳуқуқни муҳофаза қилувчи органлар мазкур видеони тарқатган шахсларга нисбатан Маъмурий жавобгарлик тўғрисидаги кодекснинг 202-2-моддаси (“Ёлғон маълумот тарқатиш”) бўйича иш қўзғатди. Улар 20 млн сўмдан 41,2 млн сўмгача жарима билан жазоланиши мумкин.
