Давлат раҳбари бугун тиббиёт ва фармацевтика ходимлари билан учрашув ўтказиб, уларни касб байрами билан табриклади ҳамда соҳа ривожига оид янги ташаббусларни муҳокама қилди.
Президент Шавкат Мирзиёев Соғлиқни сақлаш соҳаси ходимлари куни муносабати билан ўтказилган йиғилишда тиббиёт ва фармацевтика соҳалари ривожига қўшаётган ҳиссаси учун шифокор ва ҳамшираларни самимий табриклади.
“Замонавий тиббиётни фармацевтикасиз тасаввур қилиб бўлмайди. Шу боис бу байрамни энди ъТиббиёт ва фармацевтика ходимлари куниъ деб аташни таклиф этаман”, – деди Президент.
Давлат раҳбари сўнгги йилларда соғлиқни сақлаш тизимига 230 триллион сўм (20 миллиард доллар) йўналтирилганини таъкидлади. Фақат жорий йилда соҳа учун 45 триллион сўм ажратилган бўлиб, бу 2016 йилга нисбатан олти баробар кўпдир. Шу асосда 187 та янги шифохона ва поликлиника ишга туширилган, яна 1 244 та тиббиёт муассасаси реконструкция қилиниб, замонавий жиҳозлар билан таъминланган.
Юртимизда бирламчи тиббиёт тизими қуввати 60 фоизга ошиб, илгари фақат пойтахтда бажарилган юқори технологик амалиётларнинг 400 дан ортиғи ҳудудларда ҳам амалга оширилмоқда. “Биринчи марта 45 та туманда буйрак кўчириб ўтказиш амалиёти йўлга қўйилгани – бу халқ саломатлиги йўлида эришилган катта ютуқ”, – деди Президент.
Шунингдек, сўнгги йилларда эркаклар ўртача умр кўриш давомийлиги 71 ёшдан 73 ёшга, аёлларники эса 76 ёшдан 77,5 ёшга узайгани қайд этилди. Бу натижаларга 600 мингдан зиёд тиббиёт ходимларининг фидокорона меҳнати сабаб бўлгани алоҳида таъкидланди.
Йиғилишда Президент инфляцияни жиловлаш ва дори-дармон нархларини барқарор ушлаб туриш масалаларига ҳам тўхталиб, айрим марказларда ажратилган маблағ ва ускуналардан самарали фойдаланилмаётганини танқид қилди. “Ускуналарнинг қувватидан атиги 25 фоиз фойдаланилмоқда. Бундай ҳолатни ўзгартирмасак, соҳада натижа бўлмайди”, – деди давлат раҳбари.
Шунингдек, тиббиёт муассасаларини рақамлаштириш, хорижий ҳамкорларни жалб этиш, клиник протоколларни янгилаш ва замонавий тиббий жамоани шакллантириш зарурлиги уқтирилди.
Йиғилиш якунида Президент соҳа вакилларини давлат мукофотлари билан тақдирлади. Улар орасида хорижда таҳсил олган ва мамлакатга қайтиб келиб, илғор муолажаларни амалга ошираётган ёш шифокорлар ҳам бор.
