Божхона қўмитасида 2025 йилнинг 10 ойи давомида божхона органлари томонидан амалга оширилган ишлар юзасидан брифинг бўлиб ўтди.
Брифингда таъкидланишича, жорий йилнинг январь—август ойларида чегара-божхона постлари орқали қарийб 1,5 миллион юк автомобиллари (+25%), 670 мингдан ортиқ юк вагонлари (+14%) ҳамда 50,5 миллион йўловчи (+10%) ҳаракатланган.
Ҳисобот даврида 946 мингдан зиёд божхона юк декларациялари расмийлаштирилгани қайд этилди. Тадбиркорларнинг молиявий барқарорлигини қўллаб-қувватлаш мақсадида, 12 мингдан ортиқ ташқи иқтисодий фаолият иштирокчисига 47 трлн сўмлик имтиёз ва преференциялар қўлланилди. Шунингдек, 400 дан ортиқ тадбиркорлик субъектларига 4,8 трлн сўм божхона тўловларини кечиктириб тўлашга рухсат берилди.
Маълумотларга кўра, давлат бюджетига 60,7 трлн сўм божхона тўловлари ўтказилиб, белгиланган режа 101,3% га бажарилган.
Яширин иқтисодиётга қарши курашиш доирасида 34,6 мингта ҳолатда қарийб 1 трлн сўмлик товарлар, жумладан 73,3 млрд сўмлик валюта қимматликлари, 114,1 млрд сўмлик заргарлик буюмларининг ноқонуний айланмасига чек қўйилди.
Аҳоли саломатлиги ва хавфсизлигини таъминлаш мақсадида олиб борилган чора-тадбирлар натижасида 1 тонна 610 кг гиёҳванд моддалар, 1 тонна 55 кг дан ортиқ психотроп ва кучли таъсир этувчи моддалари, 137 дона ўқотар ва совуқ қурол, 566 дона патрон, шунингдек, 44,5 млрд сўмлик тамаки маҳсулотлари ушлаб қолинди.
Рақамлаштириш жараёнлари самараси сифатида экспортда 94%, импортда 85% божхона юк декларациялари соддалаштирилган тартибда расмийлаштирилди. Инсон омилисиз декларация расмийлаштирилиши экспортда 45%, импортда эса 6% ни ташкил этди.
Божхона ҳудудида қайта ишлаш режимидан фойдаланувчи тадбиркорлар сони 443 нафарга етди. Бу режим бўйича 979 млн долларлик товарлар жойлаштирилиб, қайта ишланган 1,2 млрд долларга яқин маҳсулотлар (+43%) экспорт қилинди.
