Ўзбекистон терма жамоасининг собиқ бош мураббийси Темур Кападзе CNN Indonesia’га берган изоҳида Индонезия футбол федерацияси билан музокаралар ўтказмаётганини айтди. Унинг таъкидлашича, Жакартага келишдан мақсад – туризм соҳасида берилган таклифни ҳурмат қилиш бўлган.
“Мен бу ерга туризм бўйича таклиф ҳурмати учун келдим. Индонезия терма жамоасининг мураббийлиги ҳақида музокаралар режалаштирилмаган”, — деди Кападзе.
Мураббий Жакартадаги “Истиқлол” масжидига ташрифи, жума намози ва шаҳар билан танишуви уни кучли таассуротга солганини қўшимча қилди. У Индонезия ва Ўзбекистон ўртасидаги ўхшашликлар, айниқса диний урф-одатлар яқинлиги уни хурсанд қилганини таъкидлади.
