Тошкент вилоятида ўтказилган тезкор-профилактик тадбирлар чоғида икки фуқаронинг яшаш хонадонларидан жами 7 кг 326 грамм “марихуана” моддаси топилди. Зангиота туманида яшовчи 1978 йилда туғилган А.А.нинг уйидан 5 кг, Қибрай туманида истиқомат қилувчи 1974 йилда туғилган Д.А.нинг уйидан эса 2 кг 326 грамм гиёҳвандлик воситаси олингани маълум қилинди.
Текширувда уларнинг гиёҳванд моддаларни уй шароитида етиштириб, савдо қилиш мақсадида сақлаб келганлари аниқланган. Ҳар иккисига нисбатан Жиноят Кодексининг 273-моддаси 5-қисми билан жиноят иши қўзғатилиб, қамоқ эҳтиёт чораси қўлланди.
Яна бир ҳолатда Россиядан олиб кирилаётган синтетик наркотик моддалар ДХХ ва Божхона қўмитаси ходимлари томонидан “Навоий” чегара божхона постида тўхтатилган. Қозоғистондан кириб келган, 1989 йилда туғилган А.А. ва 1994 йилда туғилган М.А.га тегишли бўлган икки дона редуктор ичидан 4 кг 965 грамм “клефедрон” аниқланган.
Тошкент шаҳрида ушбу модда қабул қилиб олинганидан кейин уларга алоқадор яна 3 нафар шахс — Э.Б., И.И. ва О.Ж.лар қўлга олинган. Аниқланишича, гиёҳванд моддалар турли мессенжерлар орқали Россия Федерацияси фуқароси томонидан юборилган.
