Қирғизистон парламенти депутати Элдар Сулайманов собиқ рафиқасига мунтазам зўравонлик қилганликда айбланмоқда. Бу ҳақда унинг собиқ рафиқаси Асел Азаматова “Threads” ижтимоий тармоғида хабар берди, деб ёзмоқда BBC нашри.
Аёлнинг сўзларига кўра, улар 2016 йилда оила қурган, дастлабки йиллар нисбатан тинч ўтган. Бироқ икки йилдан сўнг турмуш ўртоғи унга қўл кўтарган. Асел Азаматова зўравонликларга чидашининг сабаби — фарзандларини отасиз қолдирмаслик бўлган.
2022 йилда ҳомиладорлик даврида жиддий калтакланиб, қон кетиши билан касалхонага ётқизилган. Шифокорлар ҳомилани сақлаб қолиш имконияти камлигини айтган. Шу пайтда у ҳуқуқ-тартибот органларига мурожаат қилган, аммо кейинчалик эрини кечирган. Зўравонлик давом этгани сабабли у уч фарзанди билан ажрашишга мажбур бўлган.
Аёлнинг ҳикоясига кўра, собиқ эри болалар таъминотини беришдан бош тортган ва кундалик ҳаётни қийинлаштирган. 2023 йил 28 июлда у болаларни олиб кетишга ҳаракат қилганида, Асел хавфсизлик учун қаршилик кўрсатиб, кўчага югуриб чиқиб, машинанинг ойнасини синдирган. Натижада уни беш ойлик боласи билан уч суткага изоляторга жойлашган. Кейинчалик суд жараёнлари бўлиб ўтган ва аёл айбдор деб топилган.
2024 йил 6 апрелда Асел Азаматова собиқ турмуш ўртоғининг уч фарзанди кўз ўнгида уни калтаклаганини билдирган ва яна милицияга мурожаат қилган.
Жогорку Кенеш депутати Элдар Сулайманов ҳозирча бу воқеа юзасидан ҳеч қандай изоҳ бермади. Ички ишлар вазирлиги матбуот хизмати раҳбари Султан Макилов текширув ишлари бошланганини маълум қилди.
