Украина Махсус операциялар кучлари тарқатган баёнотга кўра, Шимолий Қрим канали устидаги мазкур кўприк Россия армиясининг жанубий фронтдаги асосий логистика тармоқларидан бири ҳисобланган.
Киевнинг таъкидлашича, ушбу объект орқали Россия ҳудудидан Қрим ва фронт чизиғига ҳарбий техника, қурол-яроғ ҳамда бошқа таъминот воситалари етказиб берилган.
Украина ҳарбийлари ҳужум икки босқичда амалга оширилганини билдирмоқда. Маълум қилинишича, 22 июнга ўтар кечаси дронлар ёрдамида берилган зарба оқибатида кўприкнинг бир қисми вайрон бўлган. Кейинги кечада эса объектни таъмирлаш учун жалб қилинган махсус техника яна дрон ҳужумига учраган.
Махсус операциялар кучлари мазкур амалиёт Россия армиясининг таъминот занжирларига зарба бериш ва унинг жанговар имкониятларини чеклаш мақсадида ўтказилганини қайд этган.
Шу билан бирга, Россия расмийлари Украина томонининг бу баёнотига ҳозирча муносабат билдирмаган. Кўприкнинг тўлиқ вайрон қилингани ҳақида ҳам мустақил манбалар томонидан тасдиқланган маълумот мавжуд эмас.
Сўнгги ойларда Украина Қрим ва Россия назорати остидаги ҳудудларда жойлашган ҳарбий инфратузилма, аэродромлар ҳамда логистика объектларига қарши дрон ҳужумларини фаоллаштирган. Киев бу ҳаракатлар Россия қўшинларининг таъминот тизимини издан чиқаришга қаратилганини таъкидлаб келмоқда.
