29 февраль куни Анқарага расмий ташриф доирасида Ўзбекистон ва Туркия президентлари Ҳатай вилоятининг Арсуз туманида қурилган “Ўзбекистон” тураржой мажмуасини очиб берди, дея хабар қилди Президент матбуот хизмати.
Маълум қилинишича, зилзиладан жабр кўрган аҳоли учун мўлжалланган ушбу мажмуа 24 та кўп қаватли уй ва 300 дан ортиқ тўлиқ жиҳозланган хонадондан иборат. Лойиҳа барча зарур инфратузилмани ўз ичига олган.
Маросимда сўзга чиққан Шавкат Мирзиёев Ўзбекистон Туркияни оғир синовли кунларда ёлғиз қолдирмаганини таъкидлаб, қутқарув ва тиббий ёрдам жараёнларида фаол иштирок этилганини қайд этди.
Ражаб Тойиб Эрдўған эса мазкур мажмуа ўзбек ва турк халқлари ўртасидаги дўстлик ва биродарликнинг ёрқин рамзи эканини таъкидлади. Давлат раҳбарлари янги уйларнинг калитларини эгаларига тантанали равишда топширди.
