Давлат хавфсизлик хизмати ва ички ишлар органлари ҳамкорлигида ўтказилган тадбирда Юқори Чирчиқ тумани ҳудудида ҳаракатланаётган Spark автомашинаси тўхтатилди. Текширув давомида унда интернет орқали фаолият юритувчи наркодўконга хизмат қилган 1993, 1994 ва 1995 йилларда туғилган уч нафар фуқаро борлиги аниқланди. Улардан 37 дона “Тропикамид” ҳамда 124 дона прегабалин моддаси сақланган капсула ашёвий далил сифатида олинди.
Тезкор тадбир давомида наркодўконнинг “закладчик”лари бўлган яна икки нафар шахс ушланди. Улар томонидан пойтахтнинг турли ҳудудларида яширилган жами 1186 дона “Прегабалин” ва 125 дона “Тропикамид” мусодара қилинди.
Аниқланишича, мазкур дори воситалари Сергели туманида фаолият юритган нарколабораторияда тайёрланган. У ерда 1987, 1993, 1995 ва 2000 йилларда туғилган тўрт нафар шахс кучли таъсир қилувчи моддалар ишлаб чиқараётгани маълум бўлди. Хонадондан 5130 дона “Прегабалин” капсуласи, 10 кг ушбу модда, 75 флакон “Тропикамид”, 6 кг унинг хом ашёси, шунингдек, 60 минг дона бўш капсула ва флакон ҳамда лаборатория жиҳозлари олинди.
Шунингдек, алоҳида тадбирда Шайхонтоҳур туманида яшовчи 1987 йилда туғилган шахснинг уйи ва автомашинасидан 24 223 дона турли номдаги кучли таъсир қилувчи дори воситалари мусодара қилинди. Терговга қадар текширувда ушбу дорилар Қирғиз Республикасидан ноқонуний олиб кирилгани ва уларни 34 минг долларга сотиб олиб, пойтахтда қайта сотиш режалаштирилгани маълум бўлди.
Ҳолатлар юзасидан Жиноят кодексининг 251¹-моддаси билан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланди. Тергов ҳаракатлари давом этмоқда.
