Қашқадарё вилоятининг Қамаши туманида жойлашган хусусий боғчада 3 ёшли бола вафот этди. Бу ҳақда Мактабгача ва мактаб таълими вазирлиги матбуот хизмати раҳбари Дилфуза Собирова маълум қилди.
Билдирилишича, фожиали воқеа жорий йилнинг 4 июнь куни Қамаши туманидаги “Зафар” маҳалласида фаолият юритган якка тартибдаги тадбиркор О.А.га тегишли оилавий нодавлат мактабгача таълим ташкилотида содир бўлган.
Дастлабки маълумотларга кўра, муассаса ходимларининг совуққонлиги ва эътиборсизлиги оқибатида 3 ёшли тарбияланувчи автомашина ичида унутиб қолдирилган. Натижада бола транспорт воситаси ичида вафот этган.
Қайд этилишича, мазкур таълим муассасаси раҳбарияти ва масъул ходимлари болаларни автотранспорт воситаларида ташиш қоидаларига қатъий риоя қилиш бўйича тегишли ташкилотлар томонидан мунтазам огоҳлантириб келинган. Бироқ белгиланган талаб ва мажбуриятларга амал қилинмаган.
Ҳозирда мазкур ҳолат юзасидан ҳуқуқни муҳофаза қилувчи органлар томонидан жиноят иши қўзғатилиб, тергов ҳаракатлари олиб борилмоқда.
Шунингдек, ушбу боғча фаолиятини амалга ошириб келган якка тартибдаги тадбиркор билан тузилган тегишли битимлар бекор қилинган.
