Давлат хавфсизлик хизмати ходимлари томонидан ўтказилган тезкор тадбирда 2003 йилда туғилган, Тошкент шаҳрида яшовчи фуқаро бошқарувидаги “Nexia-3” автомобили Чилонзор туманидаги “Эркин” ЙПХ масканида тўхтатилиб, кўздан кечирилди. Натижада автомашина салонидан соф оғирлиги 4 кг 811 грамм бўлган “Альфа ПВП” синтетик наркотик моддаси аниқланиб, ашёвий далил сифатида олинди.
Мазкур ҳолат юзасидан ДХХ Тергов бошқармаси томонидан Жиноят кодексининг тегишли моддалари билан жиноят иши қўзғатилиб, гумонланувчига нисбатан қамоқ эҳтиёт чораси қўлланди.
Шунингдек, Андижон вилояти Марҳамат тумани ҳудудида ўтган тезкор тадбирда давлат чегараси орқали улоқтирилган қутини қабул қилиб олган икки нафар маҳаллий фуқаро ушланди. Қути кўздан кечирилганда, унинг ичида 9 988 дона “Зардекс” номли кучли таъсир қилувчи дори воситалари борлиги маълум бўлди.
Ушбу ҳолат бўйича ҳам жиноят иши қўзғатилиб, гумонланувчиларга нисбатан қамоқ эҳтиёт чораси қўлланди. Тергов ҳаракатлари давом этмоқда.
