12 март куни Президент Шавкат Мирзиёев кибержиноятлар ва уюшган жиноятчиликка қарши курашиш, шунингдек ахборот технологияларидан фойдаланиб содир этиладиган ҳуқуқбузарликларнинг олдини олиш самарадорлигини ошириш бўйича таклифлар тақдимоти билан танишди.
Маълум қилинишича, Ўзбекистонда интернетдан фойдаланувчилар сони 31 миллиондан ошган, шундан 14 миллиони ижтимоий тармоқлардан фаол фойдаланади. Шу билан бирга, интернет ва ижтимоий тармоқлардан ноқонуний мақсадларда фойдаланиш ҳолатлари ҳам ортиб бормоқда.
Сўнгги олти йил ичида мамлакатда кибержиноятлар бўйича мурожаатлар сони 48 бараварга кўпайган. Ўтган йилда содир этилган фирибгарлик жиноятларининг 82 фоизи ва ўғрилик жиноятларининг 76 фоизи кибер маконда амалга оширилган. Натижада жисмоний ва юридик шахсларга етказилган моддий зарар 2 триллион сўмдан ошган.
Тақдимотда ахборот технологиялари орқали содир этилаётган жиноятлар учун жавобгарликни кучайтириш, янги турдаги кибержиноятлар учун алоҳида жазо чораларини белгилаш зарурлиги таъкидланди. Шунингдек, молиявий пирамида схемалари билан боғлиқ жиноятлар учун жавобгарликни ҳам кучайтириш таклиф қилинди.
Бундан ташқари, фуқароларнинг ўз номига расмийлаштирилган электрон тўлов воситалари, криптоҳамёнлар, СИМ-карталар ва электрон аккаунтлардан кибержиноят содир этишда фойдаланилишига йўл қўйганлик учун маъмурий ва жиноий жавобгарлик белгилаш ташаббуси илгари сурилди.
Тақдимотда муҳим ахборот инфратузилмаси объектларига қаратилган киберҳужумлар глобал тус олаётгани қайд этилиб, юридик шахслар ахборот тизимларининг хавфсизлигини замонавий таҳдидларга мос равишда кучайтириши зарурлиги таъкидланди.
Шунингдек, тижорат банклари, тўлов тизими операторлари ва тўлов ташкилотлари ахборот хавфсизлиги талабларига риоя қилмаганлиги сабаб юзага келган кибержиноятлар оқибатидаги моддий зарар учун жавобгар бўлиши қонунан мустаҳкамланиши таклиф қилинди.
Тақдимотда уюшган жиноятчиликнинг янги усуллари пайдо бўлаётгани ҳам қайд этилди. Хусусан, ноқонуний жанглар ташкил этилиши, жамоат тартибини бузиш билан боғлиқ жиноятлар учун жавобгарликни кучайтириш зарурлиги таъкидланди.
Президент таклифларни маъқуллаб, мутасаддиларга тегишли топшириқлар берди.
